هاوپەیمانێتی نوێی سکۆلار و دێمۆکڕات خواستەکانی کۆمەڵگای کوردستان وەپێش دەخات

هاوپەیمانێتی نوێی سکۆلار و دێمۆکڕات خواستەکانی کۆمەڵگای کوردستان وەپێش دەخات
کەیوان فەرامەرزی

لەوانەیە چارەنووسی ڕۆژهەڵاتی ناوەڕاست بەتایبەت کوردستان بەرەو گۆڕانکارییەکی گەورە بڕوات، لە هەر دۆخێکدا بین قۆناخێکی هەستیارە، کڕۆنا پووشاڵی بوونی بارەگای خامەنەئی مسەوگەرکرد وە پێویستیی تەیار بوونی بنەماڵەی کورد لە ئەگەری گۆڕانکاری لە داهاتویەکی نیزیکدا زیاتر هەستی پێکرا، ئەوانە و ئەزموونی ڕابردوو دەریدەخات کە یەک حزب یا  تەنانەت بەرەی یەک ڕەوت ناتوانێ بە سەر هەموو بوارەکاندا زاڵ بێ و پلانەکان بە پوختەیی دابڕێژێت بۆیە کوردستانی  ڕۆژهەڵات وەک هەر کۆمەڵگایەکی مەدەنی دیکە لە هەموو بوارێکەوە پێویستی بە کۆدەنگی زیاتر هەیە تا چ ئێستا و چ لە داهاتوودا لە ڕێگای کۆی ئەزموونەکانەوە خوێندنەوەی ئەمڕۆیی هەبێت لە مەر پیادە و بەڕێوەبەریی هەموو ئەرکە داڕێژکراوەکانی پەیوەندیدار بە کۆمەڵگا. 
کەم نین کەسانی سەربەخۆی شارەزا، پسپۆڕ، نەتەوەیی خۆبەش و بە ئەزمون هەروەها کەسانی دوورکەوتوو لەحزبەکان هەم لە ناو خۆی نیشتمان و هەم لە ناو کوردەکانی دیاسپۆڕادا وە هێزێکی شاراوەیش نییە، بەڵکۆ ئەرتەشێکی بەتوانای هاوئاڕمانە کە دەتوانێ زۆر کاریگەر بێ لە سەر چارەنووسی نەتەوەی کورد لە ڕۆژهەڵات، بەڵام بەربڵاو و بێ مەکۆیە.
یەکێک لە پێوەرەکانی چەمکی ئازادی و بە ئامانچ گەیشتن لە کوردستان پێکهاتنی هاوپەیمانی و  ناوەندگەلێکی بەرپرس و پەیوەندیدار بە کێشە و چارەنووسی هاووڵاتییانی کوردستانی  ڕۆژهەڵاتە، وە ئەو کۆ دەنگیانە دتوانن نەتەوی کورد لە ناو ئێران و دەرەوە بەهێزتر بکەن، هاوکات لە گەڵ تەمرینی دیمۆکڕاسی  ڕێز گرتنە لە ڕێکخراوە دێمۆکڕاتیکەکان لە پێناو پتەو کردنی خواستەکانی کۆمەڵگا بۆ گەیشتن بە سەربەستی، جیا لە هەموو ئەوانە دەستی هاوکاریی هەر خەباتکارێکی کورد لە پارچەکانی دیکە بۆ هاوکاری ئاواڵە دەکات.
چاوخشاندنێک بە سەر بەڕێوەبەرانی زلهێزی دنیادا دەری دەخات هیچ لایەنێک بە تەنیا سەرکەوتوو نەبوە و نابێ هەر ئێستاکە شەڕی ئابوری ئەمریکا لە گەڵ ڕووس و چین وە مۆڕە لە یەکتر کردنیان لە ئازایەتی و بەهێزبوونی یەکتر نییە بەڵکو پشت گەرم بوون بە هاوپەیمانەکانیانە،  لە زۆر شوێن پێکهێنانی بەرە لە مەر ڕاگرتن و پتەوکردنی باوەڕەکان لە پێناو گەیشتن بە ئامانجەکانە وەک هاوپەیمانیی لیبەڕاڵەکان، سۆسیالیستەکان، سەوزەکان و سەدان هاوپەیمانییەتی دیکە.
تەنانەت ئێرانی پڕ لە قەیرانیش ئەگەر گیانی خەریکە بە زەحمەت دەردەچێ و ئەو هەناسەیە کە ماوێتی لە بەر هاوپەیمانە بەرژەوەندخوازەکانییەتی دەنا هیج دیکتاتۆڕیک بە زۆر نەماوە و لە مێژ بوو سەرانی رژیم دەکەوتنە بەر دادگایی خەڵکی ئێران.
بەیەکەوە بوون یا کۆمەڵ دروست کردن یانی لاواز کردنی کەمایەسییەکان وە بەهێز کردنی  تواناکان، بۆیە هەر هاوپەیمانییەک لە سەر چەند خاڵی هاوبەش نیشانەی دەستکەوتی هێزی ئینسانییە وە هەم  ئێستا و هەم بۆ نەوەکانی داهاتوش دەبێتە  هەژمۆنی کەیس و خواستی خەڵکی کوردستان لە ناوخۆ و لە دەرەوە. مەرج نییە یەک هاوپەیمانیی کوردستانی بە تەنها نوێنەرایەتی هەموو کێشە و خواستەکانی کۆمەڵگای کوردستان بکات! بەرەی ژنان، سۆسیال دێمۆکڕاتەکان، دیموکڕاتەکان، کۆمەڵەی دیاسپۆڕای کوردانی دەرەوەی وڵات و لاوان وە دەیان نموونەی دیکە دەتوانن لەم سەردەمەدا بە شێوەیەکی ئاکادێمیک و زانستانە پاش ڕاڤە و ڕاوێژ هەوڵی دامەزراندنیان بدرێت.
 بۆ نموونە هاوپەیمانیی ژنانی کوردستانی ڕۆژهەڵات، مەرج نییە تەنیا ڕێکخراوی ژنانی سەر بە حزبەکان لەو هاوپەیمانییەدا ئەندام بن!، با کەسایەتی ئاکادێمیکی سەربەخۆ یا نووسەران، مامۆستایانی زانکۆکان، سەندیکا و  ئەنجۆمەنەکانیش ئەندام بن تەنانەت با ڕێکخراو و کەسایەتییەکانی کوردستانی باشور، باکور و ڕۆژئاواش هاوکار و ئەندام بن. 
 بە هەمان شێوە هاوپەیمانیی سۆسیال دێمۆکڕاتەکانی ڕۆژهەڵاتی کوردستان کە مەبەستی ئەم نووسراوە کورتەیە، ئەرکێکی پێویستە تاوەکو کەسایەتییەکان، ڕێکخراوەکان و هەر حزبێک و تاکێک کە خۆی لەم چوارچێوەیەدا دەبێنێتەوە بچنە ژێر چەتری وە ساڵانە ڕێکخراوەکە کۆنفڕانس و کۆنگرەی خۆی ببەستێت و بڕیارگەڵی پەیوەندیدار بە چارەنووسی خەڵکی کوردستان تاو و توێ بکات وە پاش باس و لێدوان بیکەنە بەڵگە و پلانی ئامادە بۆ پیادەکردن لە ڕۆژی خۆیدا.
تا ئێستا لە دەرەوەی وڵات کوردان نەیانتوانیوە لە کاتی پێویستدا یارمەتیدەری لێقەوماوانی ناوخۆ ببن و بەدوای ڕوودانی کارەساتگەلی سروشتی و سیاسی بە هانای هاونیشتمانانیاندا بچن  بۆ نموونە بوومەلەرزەی سەرپێل زەهاو، سوتانی کیژانی شیناوێ و لێقەومانی دەیان چالاکوانی خۆبەختکردو لە پێناو ڕزگاری وە هەزاران نموونەی دیکە، هۆیەکەی نەبوونی مەکۆیەک بۆ  ئەم کیشانەیە، بۆ چما گەلۆ ئەو هەموو کوردە لە دەرەوە ئەو هەموو بازرگان، دوکاندار، خوێندەوار و بەرپرسە ناتوانن بە یەکەوە کۆدەنگ و هاوئاهەنگ یارمەتیدەربن؟ بۆ ناتوانن خاچی سووری سەربەخۆی دوور لە حزب دابمەزرێنن؟ خۆ دەکرێت لە پەنا تاکەکاندا لە پێناو بەرژەوەندیی باڵای نەتەوەیی هەموو حزبەکانیش لە راستەوە بگرە تا چەپ یارمەتیدەری بن.
ئەوانە و زۆر نموونەی دیکە وەک لاوان، ژینگە پارێزان و هتد...  دەتوانن ڕەوتی گەیشتن بە بەرپرسایەتی بەرامبەر بە کۆمەڵگا و گەیشتن بە ئامانج یاسایتر و بە شێوەی ستانداردی نێودەوڵەتی  ڕێگە خۆشکەربن بۆ  هاوکاری و پێشکەوتوویی زیاتری کۆمەڵگا.
لە دەیەی یەکەمی سەدەی ٢١دا بۆ یەکەم جار کەیسی کورد هاتە ناو دەسەڵاتدارنی بڕیاردەر و ناوەندە نێودەوڵەتییەکانەوە، ڕاستە پەیوەندیی ئەوتۆی بە کوردی بن دەستی ئێران نەبوە بەڵام کوردانی ڕۆژهەڵات دەتوانن شانی وەبەر بدەن و بە پێکهێنانی  هاوپەیمانیی هاوبەش لە سەر بنەمای گەیشتن بە ئامانجەکان بەشێک بن لە بەرین کردنی ئەو بابەتە لە پێناو بەرز ڕاگرتنی بەردەوامیی کەیسی کورد لە ناو ئێران و ناوەندە نێودەوڵەتییەکان.
لە فەرهەنگی وڵاتانی دێموکڕاتیکدا زۆر کەس  بە بێ ئەوەی لە حزبدا بەرپرسایەتییان هەبووبێت لە لایەن حزبەوە بە پێی توانا جێگە و پێگەیەیان بۆ ڕاپەڕاندن و بەڕێوەبردنی ئەرکەکان لە ناو کۆمەڵگادا پێدراوە زۆر جار بیندراوە کەس هەبوە ئەندامی حزبیش نەبوە بەڵام لە بەر تواناییەکەی پۆستی باڵای دەوڵەتی پێ سپێردراوە وەک سەرۆکی شارەوانی، دەستنیشانکردن بۆ پاڕڵمان و تەنانەت وەزیر، بۆ ئەم  سەردەمە و ئەو دۆخە کە ئێستاکە کورد تێپەڕی دەکات پێکهاتنی هەر یەکێتییەک هەلە و  هاندانە  بۆ بەشداریی کەسانی بە توانا و بەئەزموون تا لە پێناو  وەدیهاتنی ئاواتی نەتەوەکەیاندا بەشداریی ئەم ئەرکە گرنگە بکەن، بۆ نموونە گومانی تێدا نییە لە ئەگەری درووست بوونی هاوپەیمانییەکی سۆسیال دێمۆکڕات بۆ ڕۆژهەڵاتی کوردستان، جیا لە ڕێکخراوەکان بە سەدان ژن و پیاوی بە ئەزموونی کورد لە ناوخۆ و دەرەوە چالاکانە بەشداری تێدا دەکەن، هەروەها ئەم کارە فراوان کردنی مەیدانە بۆ  هێزی پنگ خواردوی پێشکەوتووی بەتوانای  کۆمەڵگا.
هەرچەند وەدرەنگی کەوتوە و کەمتەرخەمیی هەمەلایەنە هۆکارە بەڵام ئێستاکە و لە گۆشەنیگای سیاسەتوانانەوە دەست لە ناو دەستی یەک و هاوکاریی و هەوڵی پلانی هاوبەش هێچکات درەنگ نییە. 
 مەبەستی ئەم کورتە نووسراوەیە نەکۆڵی لە یەکگرتوویی سەراسەری وەک کۆنگرەی نەتەوەیی یا کۆنگرەی ڕۆژهەڵات و ڕۆژهەڵات تەوەری نییە بەڵکو ئاماژەیە بە گرنگیی نیزیک بوونەوە و هاوکاریی زیاتری هەموو ئەو کەسایەتی و گروپ و ڕێکخراوانە کە لە پێناو وەدیهاتنی ئامانجێکدا خاڵی هاوبەش و ئاڕمانێکیان هەیە، هەروەها نیزیک بوونەوەی زۆربەی ئەوانە وا لە حزبەکان دابڕاون، هاوکات دان پێدانانە بە هەنگاوی وردبینانە و داڕشتنی پلانەکان بە هاوئاهەنگی زیاتر تا پیادەکردنیان، بەدڵنیاییەوە لە کورتماوەدا  ڕەهەندی سیاسی بزووتنەوەی کورد قورستر و کاریگەرتر دەبێت وە لە درێژماوەدا دەبێتە هۆی مسەوگەر بوونی ھەڵکشانی بزاڤی دێمۆکراسی و ئازادیخوازی کورد.